نتيجة معادلة كلية الهندسه 2010 جامعه القاهرة

سنتابع هنا أخبار معادلة كلية الهندسه أن شـاء الله حتـى ظهور النتيجه بأذن الله


انا عندى نصحتين عايز اقولهم لطلاب معادله كليه الهندسه من اخوكم لوجه الله يمكن يساعدوهم ان شاء الله فى دخول الهندسه ويطلعوا اجمد مهندسين .... باعتبار انى اعرف المواد اللى بيدرسوها فى المعادله وعارف تتذاكر فى اد ايه والكلام دا

هقولكم ببساطه على المشكله الشائعه جدا اللى طلاب المعادله بيقعوا فيها وبعدين هنشوف ايه الحل عشان منقعش فى المشكله دى ( وفى الاول والاخر دى مجرد رأيى الشخصى ... وممكن يكون لكل واحد راى تانى ).هما

النصيحه الاولى : فكره انك تقدم فى المعادله وتذاكر المواد دى فى شهر وتدخل تمتحن وتنجح .. دى فكره صعبه جدا ... ممكن تقول مثلا ان احتمال نجاحها هوا بالظبط نفس احتمال نجاح مصر فى الفوز بكاس العالم بالظبط .. اقصد اقول : طبعا صعب جدا الموضوع دا ... لان كم المواد كبير على انك تستعيبوا فى شهر او اتنين فا اللى بيحصل ان طالب الدبلوم الفنى اول ميخلص الدبلوم ( بكل همه ونشاط ) يروح يقدم فى المعادله ويحضر ومن تالت محاضره يبدا يتصدم ويلاقى الدنيا وسعت منو ويحبط ويياس ويطلع فكره الهندسه من دماغو مع انوا دماغو نضيفه جدا وخساره انو ميكملش دراسه فى الهندسه كل الحكايه انو خد السكه الصعبه ..دا طبعا بالنسبه ل 95% من الطلبه

النصيحه التانيه : ( ودى انا شوفتها بعنيا فى اعدادى هندسه بتاعتى والله دا بجد ) خلينا نفرض ان طالب المعادله حفظ المواد بتاعت المعادله واللى حفظوا دخل لقاه فى الامتحان وكتبوا وربنا كرموا ونجح ( دا انجاز كويس جدا ) ودخل كليه الهندسه ..هتقابلوا مشكله اكبر انوا فى الكليه هيدرس مواد (مجعلصه اكتر) يعنى اصعب شويا.. فمثلا هيدرس (ماده رياضه) هتكمل على منهج الرياضه بتاعت المعادله ... فلو انتا مش فاهم منهج المعادله وكنت حافظوا او برشمت او نجحت بواسطه او اى حاجه غير انك كنت فاهموا ... دى مش شطاره لانك هتدخل تتصدم فى الكليه بان الناس اللى حواليك فاهمين وانتا لا ... وفى الكليه مش هتلاقى المدرس اللى يعد يفهمك مبادى الرياضه من الاول ... فا اللى بيحصل ان النوعيه دى من الطلبه بكل حزن بتسقط فى الكليه ومبتقدرش تكمل وبتستوفى سنوات اعدادى وتطلع برا الكليه .. انا شخصيا كنت متعرف على طلبه معادله فى اعدادى كانوا معانا وللاسف والله رغم انهم كانو دماغهم جامده ومجتهدين جدا بس سقطعوا وسابوا الكليه لانهم مش فاهمين المبادى , فا بالتالى مش فاهمين المناهج الجديده ... شيى محزن جدا فنصحتى انك لما تدرس مواد المعادله حاول تفهمها وتستعيبها دا هيساعدك كتير جدا ان شاء الله لما ربنا يكرمك بالكليه

طيب يعنى ايه الحل ؟؟
رأيى ان الحل فى ان المعادله متذاكرهاش فى شهر او اتنين يعنى تبدأ تذاكرها من السنه اللى قبلها علشان تفهمها واحده واحده ومن غير صربعه ودا هينفعك فى حاجتين
1 / انك ان شاء الله هتنجح فى الامتحان بتاع المعادله لانك بقالك سنه كامله بتذاكرلها
2/ انك كمان هتدخل الكليه بامر الله وانتا فاهم مبادى الرياضه والفيزياء والميكانيكا

فنصحتى لكل طالب معادله فنيه نوى من جواه انوا يبذل شويت مجهود ويتكل على الله ويتقدم للمعادله : انو ميستعجلش وياخد وقتوا فى المذاكره كامل

واهم حاجه باا عايز اقولها صدقنى والله لو اجتهدت هتنجح بكل سهوله الموضوع مش صعب ولا حاجه خالص هوا عايز حاجتين بس ( اجتهاد + وقت ) وطبعا بتوفيق ربنا كل حاجه فى الاول والاخر

طب مين هيفهمك مواد المعادله طول فتره منتا بتذاكر ؟؟
فيه مراكز تعليميه متخصصه فى تدريس مناهج المعادله موجوده كتير واسعارها كويسه وبيبداوا من بدرى فى الكورس ...من شهر 10 مثلا لحد شهر 8 السنه اللى بعدها ...يعنى مده الكورس فى المجمل 10 شهور دى فتره كويسه جدا انك تستعيب المنهج كويس انصحكم تروحوا المراكز دى هتساعدكم جداا وهتوفرلكم كل حاجه الكتب والملازم والمراجعات وتفهمكم التقديم هيبقى امتى وازاى وكل حاجه

 

Categories: